Pèy de Jeliote, badut à Lasseube en 1713, que-s mouribe à Estos en 1797, dus-cénts-bint-ans-a. Si parlen d’éth, qu’éy permou qu’abè ûe hère beroye bouts. Pay e may que-s en aperceboun e, tout yoén, que-u mandèn à û proufessou enta que poùsquẹ « puya » ta Paris. Que y estou (esté) bìstẹ counegut permou que cantabe las cansoûs deu Supra Despourrin. Més lou cantadou biarnés que puyè (puya) bìstẹ sus l’empoun de l’Opera oun tiengou lous ròllẹs màyẹs de coumpousitous celèbrẹs. Qu’ère debiengut lou « réy deus cantadous » e l’amic de gn-àutẹ réy, Louis XV medich qui l’embitabe à canta àyrẹs deu soû Biarn nadau. De 1733 à 1755 Jeliote que counegou la glòri més, fatigat per la bite de Paris, que se-n tournè (tourna) en Biarn.
Que-s dechè (decha) de quoan en quoan tenta per la capitale oun s’abè goardat ûs-quoàndẹs amics e ligams màyẹs. Qu’abém counegut despuch d’àutẹs Biarnés qui, coum éth, an caminat sus lous empouns de Paris, permou que y a de bères bouts per noùstẹ.
Més Jeliote qu’abè d’àutẹs taléns. La soûe reputacioû de galan qu’ère counegude e qu’ère plâ bist per las bères daunes de la Cour reyau. Prou enta ha yelous bèths àutes Biarnés qui disèn d’éth causes chic amistouses. Dap rasoû que l’aperèn prou bìste « diu deu goust ». Yamés û cantadou ne dé autan d’estrambord e n’estou autan agradat. N’ère pas toutû ço qui apèren û fièr gouyat…
Pas gran, qu’abè ûe care ourdenàri, bères machères roùyẹs plapades, tèste estréte, bouque grane, came-coupét, pè-tourcut… Més lous soûs oélhs passiounats qu’enhouliaben las granes daunes de la Cour e de la capitale. Que-s y parlè (parla) loungtéms de las soûes bounes fourtunes. E que parlen oéy encoère d’éth. Û bèth oustau d’Aulouroû qu’éy fièr deu soû noum. Si n’abou pas û bèth « plumage », qu’abou û beroy « ramage ». Aco que dìsẹn deus ausèths e toutû la bouts de Jeliote que hé (hasou) aunou au Biarn.
