Dòu enta tout lou pèys
Û bielh arrepouè de noùste que dit : « Au gat bantat, la coude qu’ou cat. » Que y pensàbi aquestes dies, en espian à la telé la partide de balou de Madrid coùntre Lyoû. Aquet yoc nou-m enterèsse pas goàyre, més qu’abèn dit toute la semmane que lou Real de Madrid que gagnèré, e que bouli bède quin s’y poudè gaha. Lous especialistes que disèn qu’anabe gagna per 2 ou 3 à 0. Quaùques-üs, enta nou pas ha péne aus de Lyoû, qu’ous disèn capables de merca û but. Que calè béde aquet estade cougnit de moùnde, 70 000 cridassès qui sautaben, pressats de béde quin aquets pràubes yougadous bienguts de l’arribère dou Rhone e-s anaben ha glapa. Pràubes, quio, au pa d’aqueths miliounàris lougats à hoec d’aryén enta gagna la « Ligue des Champions ».
Ne seri pas boulut esta en place dous francés qui espiaben, tout souléts, eschourdats per lou hourbàri dous entours, estoufats en aqueth estade Santiago Bernabéu, palays dou fotbal, més tabé palays de la mounéde. Que-s y bén à fanègues camisetes, casquetes, charpes e banères dab lous noums dous màyes yougadous dou club reyau.Tan de gagnat! Au cap de chèys minutes, lou Ronaldo que merca û pun. Quoan de crits et de sauts, qu’at calè béde! L’aha qu’ère mau partit entaus francés.Bertat que lous yournalistes que-s y èren escaduts!
Toutû lous de Lyoû que-s demourèn au pòste, e you tabé au mé fautulh. Ne calè pas abandouna-us, per esta droumilhous. Lou téms que-s escourrè, puch l’estanguet de la partide e las reclames à la telé. Aquiu tabé lous milioûs que-s deben apiela, pas au pouchic dous espagnòus més au de la telé. La partide que tourna coumença, més arré toustém entaus francés. Nou demourabe qu’û quart d’ore de yoc, e tout d’û cop, lou Pjanic que tournabe la poulitésse au Ronaldo.
Û enta cadû! Chic de téms entaus de Lyoû si boulèn sauba l’aunou de la patrie, de Nouste Dame de Fourvière, de Guignol, dou Rhône et de la Saône. Que y arribèn! partide egale, û pun cadû, qu’abèn gagnat! Més lous àutes, pergut qu’abèn, e quin! Pergude la partide, e tabé la « Ligue des Champions «, la bente de las camisetes e casquetes dab lou noum dous grans yougadous dou club reyau qui-p hèn pensa qu’abét autan d’aunou coum eths quoan lous abet dessus.
D’aquére hèyte, la boussete dou Reyau que-s éy estadide e lous mèstes que-s en tesiquen. Que-s at biren coum pousquién! Per Madrid, qu’an troubat lou respounsable d’aquére benalèye. L’entraynur, coum hèn pertout.Lous yournalistes que l’an dit « Fuera! »Dehore! E au praube gat bantat, la coude qu’ou-s éy cadude!
Û DE LAS CADIÈRES, PUBLIÉ LE 23 MARS 2010
https://www.larepubliquedespyrenees.fr/2010/03/23/dou-enta-tout-lou-peys,129250.php
Le texte en format word (cliquez-dessus) : Dòu enta tout lou pèys
Le texte en format PDF (cliquez-dessus) : Dòu-enta-tout-lou-pèys
En complément un autre texte de Oéy en Biarn: Istoères de Pésque.
