Heste de la sau à Salies
Adare qu’éy la rentrade, las bacances que soun acabades e las hèstes tabé. Que-n y a abut en aboùndẹ à la bile e aus bilàdyẹs petits ou grans dap lou bal e lou diményẹ misse solèmnẹ seguide per la ceremounie au mounumén deus mourts. « Perqué solèmnẹ ? » ce-m a dit (l’) Antòni qui ne y hique pas yaméy lous pès. « Autescops que disèn misse bache quoan nou-s y cantabe pas, e misse haude (haute) quoan ère de haut die. Per la hèste qu’éy méy beroy de dìsẹ solèmnẹ e que y a méy de pratique Si ères biengut qu’aberés bist que y abè plâ de moùndẹ, que la glèyse qu’ère floucade e que lous cantadous de Sént Espedit qu’abèn cantat beroy. Tout aco que hasè solèmnẹ. Tabé que y abè méy de mounéde à la quèste, chéns la toûe puch que nou y ères pas. Plâ segu moussu curè que sera estat countén e que poudera paga méy adayse la luts. » (L’) Antòni que-m a respounut : « Moussu curè qu’éy û bràbẹ òmi e que souy countén per éth. » Coumplimén qui a balou, permou que (l’) Antòni nou-n hè pas soubén !
E n’éy pas lou màyrẹ qui-n recebera. « As bist aquére ceremounie au mounumén deus mourts ? D’abord, qu’ère mieydie e miéye e nou sabèn pas oun ère passade la garbe de flous, ni si ère estade coumandade. Lou màyrẹ que la-s abè desbroumbade dehéns (deguéns) l’oto.
– E quin at sàbẹs ?
– Qu’at èy coumprés en espian la care de la soûe hémne. E la minute de silénci ? As countat quoan abè durat ? Quàsi dues minutes. Lou màyrẹ que debè pensa à la soûe hémne esmalide. Més que y abou pìrẹ, lou couac deu claroû qui youguè la sounerie aus mourts. Quine bergougne ! que calè bédẹ la care deu moùndẹ.
– E you qu’èy bist lous counscrits, que-s en arridèn ! La yoenésse de oéy lou die n’an pas nat respèc !
– Dounc dap lou màyrẹ e lou claroû n’èm pas estats à la hèste augan ! »
Més (l’) Antòni qui, de quoan en quoan, e bét ço qui ba plâ, que-m a dit que l’aperitif qu’ère escadut.
« – As bist qu’arré nou y mancabe, ni à las boutélhes ni à las siétes. Que-n èy bist quàuquẹs-ûs qui nou ban yaméy à l’aubèrye permou deu regìmẹ qui-s an desbroumbat lou diabète e qui an hèyt la plégue dinque l’an qui arribe ! Que poudém dìsẹ coum enta la misse qu’ère û aperitif solèmnẹ. »
Lou hoéc d’artifici tabé qu’esté (qu’estou) escadut. (L’) Antòni que-m a dit que nou l’abè ni bist ni entenut. Més coum nou-s abè pas mancat l’aperitif qu’ère lhèu permou d’aco que droumibe…
Û DE LAS CADIÈRES – 14/09/2017
